KUDEA>Go! mugikortasun kolaboratiborako zerbitzu berria abian da.

Gure herrien arteko mugikortasuna erreztuko duen aplikazioa jada zure mugikorrean izan dezakezu.

Nafarroako Mendialdeko zenbait udalen babesaz, tartean Larraungo eta Lekunberriko Udalak, bertatik sortutako mugikortasun kolaboratiboko proiektua abian jarri da. KUDEA>Go! eguneroko joan-etorriak zure herriko eta eskualdeko pertsonekin parteka ditzakezu, haien artean inolako transakzio ekonomikorik egin gabe. Aplikazio horren bidez, landa-eremuko biztanleak eskualdeko biztanleekin harremanetan jar daitezke, garraiobidea partekatzeko eta, hartara, eskualde osoko mugikortasun jasangarria sustatzeko.

Landa-eremuetan erabiltzeko pentsatutako eta diseinatutako aplikazioa da, non garraio-soluzioen beharra bereziki larria baita. Gainera, aplikazio horri esker, udalerrien eta bertako biztanleen arteko konektagarritasun handiagoa lortuko da. Zerbitzu honekin, landa-eremuan eragiten diguten gaietan sakontzea nahi dugu: despopulazioa, mugikortasunaren eta ingurumenaren arteko desberdintasunak. Komunitatean, kohesio sozio-ekonomikoan eta topaketan eragin positiboa izango duen tresna.

 

Funtzionamendu sinplea

KUDEA>Go! bi hizkuntzatan erabil daiteke, gaztelaniaz eta euskaraz, eta dagoeneko eskuragarri dago App Store eta Google Play-n: https://play.google.com/store/apps/details?id=app.journey

Gailuan instalatu ondoren, erabiltzaile bakoitzak erregistratu egin beharko du erabiltzen hasteko. Oso erraz funtzionatzen du: aplikazioaren bidez egin diren eskaera guztiak agertzen diren iragarki-taularen bidez, eremu bakoitzean une jakin batean zer garraio-eskaera dauden ikus daiteke. Ibilbide bera egin nahi duen estaldura-eremu interesgarrian norbait aurkituz gero, pertsona horrekin harremanetan jartzeko eta tresnak eskaintzen duen txataren bidez xehetasunak ixteko aukera ematen du.

KUDEA>Go! beste funtzio batzuk ere baditu, hala nola galtzadan gertatzen diren gorabeheren berri ematea gainerako erabiltzaileei (errepide-mozketak, animaliak pasabidea oztopatzen, ikuspen-baldintza txarrak, etab.). edo pertsona bakoitzak bere ekintza eremua sortzeko aukera, eguneroko mugikortasun beharren arabera. Garraio-eskaerak edozein unetan alda eta ezezta daitezke. KUDEAren YouTubeko kanalak bideoerakustaldia eskaintzen du, tresnaren funtzionamenduari buruzko xehetasun gehiagorekin.

CEDERNA GARALUR elkarteak Banda Zabalaren Gida argitaratu du, internet-konexioaren inguruko hobekuntzetan laguntzeko tresna.

Helburua informazioa eta esperientziak partekatzea da, gure herrietako eten digitala desagerrarazi eta herriak biziberritzeko aukera emateko.

Cederna Garalur Elkarteko Zuzendaritza Batzordeak Banda Zabala lantzeko lantalde bat bultzatu du 2020an. Helburua informazioa eta esperientziak partekatzea da, Nafarroako Mendialdean banda zabaleko sareak hedatzea errazte aldera, horrela, gure herrietako eten digitala desagerrarazi eta herriak biziberritzeko aukera emateko. Lantalde horren emaitzetako bat Nafarroako Mendialdeko toki-erakundeentzat eta herritarrentzat banda zabalari buruzko gida bat egitea izan da (agiria berri honen bukaeran atxikituta duzue).

Gidaren alderdi garrantzitsuenak azaltzeko eta egon daitezkeen zalantzak argitzeko, Cederna Garalur Elkartetik Gida hori aurkezteko hitzaldi baterako deia egin dute. COVIDak eragindako egoera dela-eta, saioa linean izanen da, esteka honetan: https://meet.jit.si/Cederna -Garalur. Bertan parte hartzea errazteko, lau ordutegi proposatu dituzte:

 

Abenduaren 10a, osteguna Goizez 9:30-11:00
Abenduaren 10a, osteguna

Arratsaldez

 18:00-19:30
Abenduaren 15a, asteartea Goizez 9:30-11:00
Abenduaren 16a, asteazkena Arratsaldez

18:00-19:30

 

Saioak doakoak dira, gaztelaniaz, eta Lorea Jamar-ek, Cederna Garalur Elkarteko IKT teknikariak, moderatuko ditu. Interesdunek ondorengo inprimaki horren bidez eman dezakete izena: https://forms.gle/t9vF87dfQtsTEp8J9. Posta elektronikoa ematea eskatzen da, baita jardunaldiko dokumentazioa bidali eta edozein ezustekoren berri emateko.

Era berean, erakunde elkartekideek aurrez aurreko saio bat eska dezakete ljamar@cederna.es helbidera idatzita. Hala ere, gogorarazi dute aurrez aurreko bileretan COVID-19aren aurkako segurtasun-neurriak bete beharko direla. Horrela bada, garapen-agentziatik modu batera edo bestera izena emateko gonbitea luzatzen die herritar zein eragileei.

 

Larraungo Udala lanean ari da banda zabala bailara osoan bermatzeko.

Aurreko ikasturtean garatutako parte hartze prozesuaren ondorioetan -non internet-abiadura herritarren kezka nagusienen artean agertzen zen- oinarrituz, lan-ildo garrantzitsuenetako bat da internet-konexioaren hobekuntza. Horrela, Udalaren lehentasunezko helburua da banda zabala bailara osora hedatzea. Uitzin eta Oderitzen 600 MB-eko abiadura duen internet zerbitzua jasotzeko aukera dute jada, Telefonicak egin duen ibertsioaren ondorioz, baina banda zabala bailara osora zabaltzeko bidea dugu aurretik. Horregatik, Udala hasia da Nafarroako Gobernuarekin lanean gainerako herrietan gobernuak berak ezarritako gutxieneko 30 MB horiek etxe guztietan eskaintzeko; izan ere, etxealdiak inoiz baino ageriago utzi duen bezala, eten digitala Larraungo herritar askori eragiten dien arazoa da. Ezinbestekoa dugu internet zerbitzua eskaintzea herritarrei, dagokien eskubidea da.

 

BANDA ZABALEKO GIDA: guia_banda_ancha

Elkarlanean landutako Larraungo boulder-aren proiektua, bukatzear.

Urte hau bukatzerako eskalada-gune berriaren eraikuntza bukatuta egotea eta urte berriko urtarrilean inauguratzea aurreikusten da.

Larraungo Udala herritar-talde batekin elkarlanean, eta Baraibarko Kontzejuaren laguntzaz, eskalatzeko gune baten proiektua garatzen aritu da azken urtebetean zehar. Lan hori guztia bere fruituak ematear dago, izan ere, urte hau bukatzerako eskalada-gune berriaren eraikuntza bukatuta egotea eta urte berriko urtarrilean inauguratzea aurreikusten da. Halaber, elkarlaneko bide oso bat ibili izan da honaino iritsi arte.

—

Herritar-talde bat Larraungo Udalarekin harremanetan jarri zen bailaran eskalada praktikatzeko espazio bat sortzeko proiektu berri bat abiatzeko asmoz.

—

Aurreko ikasturtean, azken urteetan rokodromoaren inguruan lanean ibili izan den herritar-talde bat Larraungo Udalarekin harremanetan jarri zen, bailaran eskalada praktikatzeko espazio bat sortzeko proiektu berri bat abiatzeko asmoz. Boulder deritzonaren proiektua landuta, Udaleko kirol-zinegotzi den Xabier Azpirotzekin eskuz esku lanean hasi ziren. Instalazio egoki baten bila jarri eta Baraibarko eskola-etxea zenaren aukera egoki ikusi zen. Horrela, Baraibarko Kontzejuari proiektuaren berri eman eta eskuzabalik hartu zuten ekimena, gunearen erabilera-zesioa egiteko prestutasuna adieraziz. Jarraian, auzolan batzuk deitu ziren, gunea egokitu, azaleko garbiketa egin eta hurrengo pausuetarako prest uzteko. Horrela bada, instalazio elektrikoa egokitu eta eskalada praktikatzeko piezak jartzea izango lirateke azken eginbeharrak.

—

Auzolan batzuk deitu ziren, gunea egokitu, azaleko garbiketa egin eta hurrengo pausuetarako prest uzteko.

—

Hori horrela, eskalada-taldetik 2020ko aurrekontuetan bailarako bi udalek 15.000 euroko diru partida bana jartzea eskatu zuten proiektua martxan jartzeko. Larraungo Udalak, bere partetik, ongi ikusi zuen herritar-talde baten ekimenez eta ilusioz abiatutako proiektua bultzatzea. Hortaz, ordura arteko lankidetzari eutsi eta inbertsio ekonomiko hori egiteko erabakia hartu zen, aurrekontuetan diru-partida hori erantsiz. Pandemia garaiak erdian harrapatu arren, Larraungo Udaletik Nafarroako Gobernuak ateratako diru laguntza bat lortzeko eskaera egin zen, kirol instalazioak erreformatzeko edo egokitzeko bideratutakoa. Bertan, beste 15.000 euroko diru-laguntza izateko aukera egon zitekeen arren, laguntza horiek udalerri handietako kirol instalazioetara bideratu ziren gehienbat, herri txiki eta ertainetako proiektuak alde batera utziz.

—

2020ko aurrekontuetan bailarako bi udalek 15.000 euroko diru partida bana jartzea eskatu zuten proiektua martxan jartzeko. Larraungo Udalak, bere partetik, ongi ikusi zuen herritar-talde baten ekimenez eta ilusioz abiatutako proiektua bultzatzea.

—

Arazoak arazo, bailarako boulder proiektu honen aldeko apustuan aurrera egin dugu, bailarako eta eskualdeko biztanleentzako zerbitzu berri bat eta aisialdi-aukera osasuntsu bat izango baita, gainera, gure ingurunearekin lotura estuagoa sortu lezakeena. Horrez gain, herri eragileen ilusio eta konpromezutik abiatutako ekimenek are balio handiagoa dute, herritarrak ahaldundu eta guztiona denaren gaineko ardura hartzeko baliagarri izan daitezkeelako. Hortaz, prozesu honetan zehar eskalada-taldearen gogoa eta konpromezua zein Baraibarko Kontzejuaren eskuzabaltasuna eskertu nahi ditugu, baita egiten ari garen bide honetan instituzio eta herritarren arteko elkarlana balioan jarri ere.

—

Eskalada-taldearen gogoa eta konpromezua zein Baraibarko Kontzejuaren eskuzabaltasuna eskertu nahi ditugu, baita lantzen ari garen instituzio eta herritarren arteko elkarlana balioan jarri ere.

—

 

Bioeraikuntzaz gehiago jakiteko aukera, larunbat honetan.

Izena ematea ezinbestekoa da

Larunbat honetan, azaroaren 28an, bioeraikuntzaren inguruko hitzaldi-tailerra eskainiko dugu Ura eta Lurra proiektuaren barruan. Indarrean dauden osasun-arauak jarraituz, 16 pertsonentzako aforoa izanen da Larraungo Udaletxera bertaratu nahi dutenentzako. Bestalde, online zuzenean jarraitzeko aukera ere eskainiko dugu, etxetik ikustea nahiago dutenentzat.

Bi kasuetan, izena ematea ezinbestekoa da, zenbaki honetara mezu bat bidaliz: 621 299 301.

Mendialdeko Azoka giro ederrean joan zen Baraibarren (argazki galeria).

Ekoizleek zein antolatzaileek oso balorazio positiboa egin dute, eta aurrera begira ekimen honekin edota antzekoekin jarraitzeko asmoa adierazi dute.

Joan den igandean, hilaren 22an, Mendialdeko Azoka izan genuen Baraibarren, eskualdeko produktuak ikusteko, dastatzeko eta erosteko aukera bikaina. Giro ederrean joan zen jardunaldia, izan ere, eguraldiak lagundu zuen eta jende asko bertaratu zen. Ekoizleek zein antolatzaileek (Larraungo Udala, Cederna-Garalur eta Plazaola) oso balorazio positiboa egin dute, eta aurrera begira ekimen honekin edota antzekoekin jarraitzeko asmoa adierazi dute.

Ekimen zehatz hau, eskualde mailan koordinatutako azoka-sorta baten baitan kokatzen da. Aurretik, Jaunsarats eta Goizuetan antolatu dira Mendialdeko Azoka deiturikoak eta aurrerantzean, eskualdeko beste herri batzuetan antolatzea da asmoa: Lekunberrin, Leitzan… Hona hemen Larraungo edizioko argazki batzuk:

Aurrera goaz eraginkortasun energetikoaren eta iturri berriztagarrien bidean.

Energia arloan inbertsioak egin dituzten Etxarri, Uitzi, Astitz eta Aldazko Kontzejuetako kideak.

Aldatzen LED argiteria publikoa jarri dute auzolanean, eta Etxarrin plaka fotovoltaikoak, bordetan.

Larraungo Udala eta haraneko kontzejuak elkarlanean ari dira energia berriztagarriak eta eraginkortasun energetikoa bultzatzeko. Oraingoan, urrats bat ematen ari dira Aldatzen, Uitzin eta Etxarrin. Argiteria publikoaren ordez LED teknologia erabiliko da horietan.  Aldatzek, dagoeneko, kontsumo-maila nabarmen jaitsiaraziko duen sistema berriaren instalazioa egin du, auzolanean. Etxarrin, aldiz, plaka fotovoltaikoa jarri da bordak hornitzen dituen ur-araztegian. Halaber, Astizko Kontzejuaren kasuan, Oderitz, Madotz eta Mendukiloko kobak hornitzeko erabiltzen den ponpaketa sistema berrituko dute.

Bestalde, zazpi kontzejuk energia berriztagarrien aldeko apustua egin dute, hornitzeko kontratuak Goiener Kooperatibara aldatuz. Kooperatiba horrek %100 iturri berriztagarrietatik energia-hornidura bermatzen du. Aldatz, Astitz, Etxarri, Errazkin, Baraibar, Alli eta Arruitz izan dira erabaki hori hartu dutenak. Kontzeju horiek guztiek, gainera, aurrera begira energia-efizientzia hobetzeko pausu gehiago emateko asmoa adierazi dute.

 

Udalaren eta Kontzejuen arteko elkarlana, ezinbestekoak.

Larraungo Udala joan den ikasturtean hasi zen ibarreko 15 kontzejuei aholku ematen, laguntzen eta koordinatzen. Horretarako, kontzeju guztiak “Kontzejuen Mahaira” deitu zituen laguntza horien berri emateko eta eraginkortasun energetikoaren garrantziaz kontzientziatzeko. Gainera, inbertsioei aurre egiten lagunduko die pauso hori ematea erabaki duten kontzejuei (Aldatz, Uitzi, Etxarri eta Astitz), guztira 15.000 euroko laguntzaz. Udalaren lehentasuna da udalerriaren garapena bultzatzea, energia modu arduratsuagoan erabiliz eta ekonomia zirkularrean oinarrituta. Horrela, bizi dugun despopulazioaren testuinguruan, gure kontzejuen energiarena bezalako gastu arruntak murriztea funtsezkoa da bailara biziberritzeko proiektuetarako baliabideak bideratu ahal izateko. Horri dagokionez, egoerak uzten duenean, Udalak kontzejuekin lanean jarraituko du hainbat proiektutan.

 

Energia arloan inbertsioak egin dituzten Etxarri, Uitzi, Astitz eta Aldazko Kontzejuetako kideak.
Energia arloan inbertsioak egin dituzten Etxarri, Uitzi, Astitz eta Aldazko Kontzejuetako kideak.
Aldaztarrak auzolanean argiteria publikoa LED sistemara aldatzen.
Aldaztarrak auzolanean argiteria publikoa LED sistemara aldatzen.
Aldatz, gauez, LED bidezko argiteria berriarekin.
Aldatz, gauez, LED bidezko argiteria berriarekin.
Etxarriko bordetako edateko uren araztegian jarritako eguzki-plaka berriak.
Etxarriko bordetako edateko uren araztegian jarritako eguzki-plaka berriak.

Mendialdeko Azoka Baraibarren: Larraun Ura eta Lurra proiektua egoera berrira egokituz.

“Ura eta Lurra proiektuaren bidetik, gure ingurunetik sortutakoa balioan jarri, ikusgarri egin eta bertatik bertarako ekonomia bultzatzea helburu izango du”

Larraun Ura eta Lurra etenaldian izan da orain arte, COVID-19aren bilakaeraren ondorioz Nafarroako Gobernuak hartutako neurriak zirela-eta. Horrela bada, egoera aztertu eta Larraun Ura eta Lurra proiektua egoera berrira egokitzea erabaki da, gure eskualdeko ekoizleen produktuak eskainiko dituen azoka antolatuz.

Larraungo Udalak, CEDERNA-GARALUR garapen agentzia eta Plazaola turismo partzuergoarekin batera, eta bertako ekoizleekin harreman estuan, Mendialdeko Azoka antolatu du. Ura eta Lurra proiektuaren bidetik, gure ingurunetik sortutakoa balioan jarri, ikusgarri egin eta bertatik bertarako ekonomia bultzatzea helburu izango du azaroaren 22an gauzatuko den ekimen honek.

Eskualde mailako ekimen koordinatua

Aipatzekoa da eskualde mailan partekatutako hausnarketa baten ondorio dela, eta inguruko udalerriekin batera koordinatutako azoka ezberdinen testuinguruan kokatzen dela; izan ere, aste hauetan zehar Goizuetan, Leitzan eta Araitzen ere azokak antolatzen ari dira, batzuen eta besteen arteko sinergiak bilatuz eta azoka horietan erosteko ohitura sustatzeko asmoz.

Horrela bada, herritar guztiei egiten diegu dei igandeko azokara bertaratu eta nahi izanez gero bertako produktuez gozatzeko aukera baliatzeko. Osasun-neurriak zorrotz betetzen direla bermatuko dugu.

Cederna Garalur garapen agentziak berdintasunari eta emakumeen aurkako indarkeriari buruzko online prestakuntza antolatu du

berdintasuna ikastaroa cederna garalur

  • Saioak online izanen dira azaroaren 3an, 5ean eta 9an, gaztelaniaz eta euskaraz, eta bi orduko iraupena izanen dute.

  • Prestakuntza tokiko ordezkariei, udal-teknikariei, emakumeen mugimendu eta elkarteei eta era guztietako gizarte- eta ekonomia-eragileri dago bideratuta.

«Kontziliaziorako Tokiko Itunak» programako genero-berdintasuna sustatzeko ekintzen barnean, Cederna Garalur Elkarteak emakumeen aurkako indarkeriaren arloko prestakuntzari eta sentsibilizazioari buruz sei lantegi (dohainik) antolatu ditu.

Saioak udal-ordezkari politikoei eta udaletako teknikariei bideratuta daude, baita Nafarroako Mendialdeko emakumeen mugimendu eta elkarteei eta ekonomia- eta gizarte-eragileei ere; besteak beste, partzuergoei, enpresei, sindikatuei, mankomunitateei edo guraso-elkarteei.

Prestakuntza bera da lantegi bakoitzerako: Sei lantegi eginen dira egun eta ordutegi desberdinetan, parte-hartzea errazte aldera. Saio birtualak izanen dira, azaroaren 3an, 5ean eta 9an, 2 orduko saioak, gaztelaniaz eta euskaraz. Gaztelaniazko saioak azaroaren 3an (10:00etatik 12:00etara), azaroaren 5ean (9:00etatik 11:00etara) eta 9an (12:00etatik 14:00etara) eginen dira. Bestalde, euskarazko saioak, berriz, 16:00etatik 18:00etara izanen dira azaroaren 3an eta 5ean, eta 15:00etatik 17:00etara azaroaren 9an. Lantegietan gehienez ere 20 lagunek har dezakete parte. Murgibe enpresak bideratuko ditu lantegiak.

Prestakuntza horren helburu nagusia da indarkeria-kasuak identifikatzeko eta tratu txarren aurrean erabilgarri dauden baliabideak ezagutzeko behar diren tresnak ematea. Horrez gain, prestakuntza horren bidez, erakunde parte-hartzaileen arteko loturak sendotzen dira, eta indarkeria-egoeren eta tratu txarren aurrean fronte komun bat eratzen da.

Prestakuntza-ekintza horiek emakumeen eta gizonen arteko berdintasuna sustatzeko proiektuen deialdian txertatzen dira, Nafarroako Berdintasunerako Institutuak sustatutako «Kontziliaziorako Tokiko Itunak» programaren barruan.

Argibide gehiago: