Zebrabide semaforizatua egokitu da NA-1300 errepidea modu seguruan gurutzatzeko eta horrela udaletxeko eremura iristeko.
Ostegun honetan, azaroaren 28an, NA-1300 errepidean, Mugiron, eta A-15 autobidetik Lekunberrirako sarbide nagusian bide-segurtasuna nabarmen hobetuko duen obra berria inauguratu da. Herritarrek eskatutako obra da, batez ere udalaren eguneroko izapideak egitera joan behar duten larraundarrek eskatutakoa.
Erabilera anitzeko eraikin eta eremurako sarbide segurua
Obra honen barruan, zebrabide semaforizatu bat jarri da, 2018ko abenduan inauguratu zen Larraungo Udalaren udaletxera sartzeko errepidea modu seguruan zeharkatzeko. Orain arte, eraikin horrek ez zuen sarbide segururik, urbanizaturik eta behar bezala arauturik, eta hori arriskutsua zen herritarrentzat. Obra berri honekin, sarbide seguru eta ordenatua bermatzen da, udaletxera joaten diren pertsona guztientzako konektibitatea eta segurtasuna hobetuz. Gogoratu behar da eraikin honetan, udalaren berezko zerbitzuez gain, euskara zerbitzua, Nekazaritza Bulegoa, Oinarrizko Gizarte Zerbitzua eta abar ere badaudela.
Gainera, “Gabari Gune Irekia” zentroan, eraikinaren teilatupean, hainbat jarduera soziokultural antolatzen dira: hitzaldiak, tailerrak, dantzak, erakusketak, musika eskola eta abar. Beste aldetik, martxora arte, gutxi gorabehera, eraikin honek, Plazaolako geltoki zaharreko energia-eraginkortasuneko obrak direla eta, eskualdeko turismo-bulegoaren zerbitzua eta Plazaola Turismo Partzuergoaren zerbitzuak ere hartuko ditu aldi baterako.
Eraikinaren inguruan, gainera, futbolean, saskibalioan, etabarretan jokatzeko eremu zabal bat dago, askotan bertako gazteek erabiltzen dutena.
Plazaolako bide berdetik jarraitutasun segurua bermatzen du
Gainera, obra honek, zeharka, Plazaolako Bide Berdearen segurtasun-arazo bat konpontzen du.. Nafarroako Gobernuko Herri-lanen eta Azpiegituren Zuzendaritza Nagusiak 2020. urtearen amaieran errepide horretako zebrabidea kendu zuenetik, bide berdearen jarraipena kolokan zegoen. Erabiltzaileek NA-1300 errepidea zeharkatu behar zuten, inolako bide-marka horizontalik gabe, bide berdetik paseatzen jarraitzeko.
Nafarroako Gobernuak, Toki Inbertsioen Planaren bidez (PIL 2023-2025), eta Larraungo Udalak berak kofinantzatu dute obra.
Segurtasuna eta bizi-kalitatea
Inaugurazio ekitaldian Larraungo Udaleko, Lekunberriko Udaleko, Plazaola Partzuergo Turistikoko, Astitzeko kontzejuko, proiektuaren proiektugilea eta obra egin duen enpresako ordezkariak izan dira. Ekitaldian, obra honek larraundarrarentzat eta, oro har, pertsona guztientzat duen garrantzia azpimarratu da, baita bide-segurtasuna eta tokiko biztanleen bizi-kalitatea hobetzeko konpromisoa ere.
