Cederna Garalur garapen agentziak berdintasunari eta emakumeen aurkako indarkeriari buruzko online prestakuntza antolatu du

berdintasuna ikastaroa cederna garalur

  • Saioak online izanen dira azaroaren 3an, 5ean eta 9an, gaztelaniaz eta euskaraz, eta bi orduko iraupena izanen dute.

  • Prestakuntza tokiko ordezkariei, udal-teknikariei, emakumeen mugimendu eta elkarteei eta era guztietako gizarte- eta ekonomia-eragileri dago bideratuta.

«Kontziliaziorako Tokiko Itunak» programako genero-berdintasuna sustatzeko ekintzen barnean, Cederna Garalur Elkarteak emakumeen aurkako indarkeriaren arloko prestakuntzari eta sentsibilizazioari buruz sei lantegi (dohainik) antolatu ditu.

Saioak udal-ordezkari politikoei eta udaletako teknikariei bideratuta daude, baita Nafarroako Mendialdeko emakumeen mugimendu eta elkarteei eta ekonomia- eta gizarte-eragileei ere; besteak beste, partzuergoei, enpresei, sindikatuei, mankomunitateei edo guraso-elkarteei.

Prestakuntza bera da lantegi bakoitzerako: Sei lantegi eginen dira egun eta ordutegi desberdinetan, parte-hartzea errazte aldera. Saio birtualak izanen dira, azaroaren 3an, 5ean eta 9an, 2 orduko saioak, gaztelaniaz eta euskaraz. Gaztelaniazko saioak azaroaren 3an (10:00etatik 12:00etara), azaroaren 5ean (9:00etatik 11:00etara) eta 9an (12:00etatik 14:00etara) eginen dira. Bestalde, euskarazko saioak, berriz, 16:00etatik 18:00etara izanen dira azaroaren 3an eta 5ean, eta 15:00etatik 17:00etara azaroaren 9an. Lantegietan gehienez ere 20 lagunek har dezakete parte. Murgibe enpresak bideratuko ditu lantegiak.

Prestakuntza horren helburu nagusia da indarkeria-kasuak identifikatzeko eta tratu txarren aurrean erabilgarri dauden baliabideak ezagutzeko behar diren tresnak ematea. Horrez gain, prestakuntza horren bidez, erakunde parte-hartzaileen arteko loturak sendotzen dira, eta indarkeria-egoeren eta tratu txarren aurrean fronte komun bat eratzen da.

Prestakuntza-ekintza horiek emakumeen eta gizonen arteko berdintasuna sustatzeko proiektuen deialdian txertatzen dira, Nafarroako Berdintasunerako Institutuak sustatutako «Kontziliaziorako Tokiko Itunak» programaren barruan.

Argibide gehiago:

Gasbidearen proiektua: alternatiba jasangarriago bat proposatu du Udalak

Larraungo Udalak, Arakilgo Udalarekin batera, administrazioarekiko auzi-errekurtsoa aurkeztu du Nafarroako Gobernuak Etxeberri eta Lekunberri arteko gasbide baterako baimena ematearen kontra, eta, aldi berean, bide berri bat aztertzeko eskatu du. Aurreikusitako gasbide horrek gure udalerriko Madotz, Oderitz, Astitz eta Alliko lurrak gurutzatuko lituzke.

Arakilgo eta Larraungo Udalek adierazi dute ez daudela gasbide proiektuaren kontra, izan ere, Lekunberrin beharra dago eta hura ase behar da. Bi udalak aukeratutako trazaduraren aurka daude. Horregatik, administrazioarekiko auzi-errekurtsoa aurkeztu dute Nafarroako Gobernuak baimena ematearen kontra. Aldi berean, Plazaolako trazadura aztertzeko eskatu dute, zentzuzkoena, inpaktu gutxienekoa eta ekonomikoena dela iritzita. Txostena aurkeztu dute horretarako. Hodi eta kanalizazio guztiak hortik doaz, esaterako, Plazaolako bide berdean barna eramaten da gaur egun Iribastik Irurtzunera arteko goi ur-hornidura sarea eta zuntz optikoaren sarea ere handik hedatzen da.

Proiektuaren eta balizko alternatiben inguruko informazio gehiago emateko, solasaldia izanen da ostiralean, urriaren 9an, Irurtzungo Kultur Etxean. Bertan izango dira, besteak beste, Mikel Uharte Larraungo alkatea eta gure bailarako Kalaxka eta Ondare taldeetako kideak.